У Год культуры напярэдадні Дня Незалежнасці Рэспублікі Беларусь
(Дня Рэспублікі) у Мінску пройдзе шырокамаштабны “Дзень вышыванкі”

2 ліпеня 2016 года (у суботу) з 12.00 да 23.00 Міністэрства культуры Рэспублікі Беларусь, Мінскі гарадскі выканаўчы камітэт, Грамадскае аб’яднанне “Беларускі рэспубліканскі саюз моладзі” арганізуюць ля сталічнага Палаца спорту маладзёжны праект-свята “Дзень вышыванкі”.

Для даведкі: вышыты нацыянальны арнамент – візітная картка беларусаў. Гэта не проста ўпрыгажэнне, а своеасаблівы шыфр, перададзены нам праз стагоддзі продкамі. Кожны ўзор у арнаменце – сімвал, які валодае магутнай энергетыкай і нясе пэўны пасыл. Здаўна арнаменты лічыліся аховай, у іх укладвалі станоўчы сэнс. Арнаменты працягваюць актыўна вывучацца сучаснымі навукоўцамі як найбагацейшая крыніца інфармацыі пра жыццё папярэдніх пакаленняў.

Павага да нацыянальных традыцый і самабытнасць беларусаў адлюстраваны ў дзяржаўнай сімволіцы нашай краіны: арнамент на беларускім сцягу ўказвае  на старажытнае паходжанне беларускага народа, на традыцыі добрасумленнай працы, павагі да гісторыі і перадае непарыўную сувязь пакаленняў.

У нашы дні адзенне з традыцыйнай вышыўкай не толькі не страціла сваю  актуальнасць, а становіцца па-сапраўднаму модным і ўсё больш папулярным у беларусаў. Выкарыстоўваючы яго ў паўсядзённым жыцці, мы дэманструем  сваю нацыянальную і грамадзянскую пазіцыю, культурную адукаванасць і духоўную свядомасць, падкрэсліваем адзінства і згуртаванасць беларускага народа.

З 12.00, пляцоўка ля Палаца спорту

На пляцоўцы ля Палаца спорту разгорнецца выстаўка-продаж вырабаў майстроў народных рамёстваў і дэкаратыўна-прыкладнога мастацтва рэспублікі  “Красуй, горад майстроў!”, майстар-класы па народных рамёствах.

14.00, скрыжаванне пр-та Пераможцаў з вул.Няміга

па праспекце Пераможцаў да пляцоўкі каля Палаца спорту

Калейдаскоп мерапрыемстваў уключае святочны арт-парад “Пад сцягам у вышыванках” – творчае шэсце прадстаўнікоў таленавітай і адоранай моладзі з усіх рэгіёнаў краіны аб’яднае ўдзельнікаў творчых і фальклорных калектываў, духавых і інструментальных аркестраў, танцавальных школ, тэатраў, прадстаўнікоў розных прафесій, нацыянальных культур, папулярных субкультур і аб’яднанняў.

З 14.30, пляцоўка ля Палаца спорту, галоўная сцэна

Пасля ўрачыстай цырымоніі адкрыцця свята на цэнтральнай сцэне стартуе творчая эстафета “Арт-фолк” – канцэртная праграма, якая складаецца з нумароў творчых калектываў, папулярных эстрадных выканаўцаў ад абласцей і г.Мінска. Падчас свята пройдзе акцыя “Гэта НАША”, падчас якой будзе арганізавана раздача стужачак з нацыянальным арнаментам”, стварэнне калектыўнага пано, флэш-моб “Славянскія матывы”, стрыт-арт “Родныя ўзоры”, фотагалерэя і ўзнагароджанне пераможцаў фотаконкурсу “Сэлфі&фота ў вышыванцы”, а таксама фотасесія ў вышыванках і тэматычных тантамарэсках.

На асноўнай пляцоўцы разгорнецца маштабная інтэрактыўная экспазіцыя “Фолк-кірмаш”, на якой кожная вобласць і горад Мінск прэзентуюць свае арыгінальныя замалёўкі, якія адлюстроўваюць фальклор рэгіёнаў краіны: традыцыйныя абрады, касцюмы, гульні, побыт, народныя рамёствы. Будзе арганізавана праца арнаментальнага боды-арт-салона, размалёўванне маек, пляцоўкі народных гульняў, конкурс “Азбука вышыванкі” і многае іншае.

Акрамя гэтага, удзельнікаў свята парадуе дэфіле мадэляў “Стыль. Натхненне. Прыгажосць” у касцюмах з элементамі вышыўкі ад беларускіх дызайнераў і вытворцаў, а таксама рыцарскія турніры за званне “Адважны рыцар”.

Заключным мерапрыемствам свята стане маладзёжная дыскатэка Disсo-folк “Вышыванка.by” і творчы конкурс “Бітва дыджэяў” з удзелам беларускіх дыджэяў з усіх рэгіёнаў краіны і г.Мінска, зорак беларускай эстрады. Абавязковая ўмова для канкурсантаў – наяўнасць у музычнай праграме тэматычных музычных кампазіцый, рэміксаваных самімі ўдзельнікамі.

Дарэчы, напярэдадні свята па ўсёй краіне адбудуцца фотаконкурс “Сэлфі&фота ў вышыванцы”, флэш-моб “Усе ў вышыванках”, акцыі “Падары нованароджанаму вышыванку”, “Падары вышыванку сябру”, тэматычныя выстаўкі і паказы ў музеях, бібліятэках, кінатэатрах і тэатрах, стварэнне агульнанацыянальнага арнаментальнага пано “Спадчына нацыі” з элементаў з вышыўкай ад кожнага рэгіёна.

Арганізатары спадзяюцца, што ініцыятыва правядзення свята “Дзень вышыванкі” напярэдадні Дня Рэспублікі стане нараджэннем добрай традыцыі,  скіраванай на папулярызацыю нацыянальнай культуры, пашырэнне духоўнай свядомасці беларусаў і захаванне злучальнай ніткі пакаленняў.

2 ліпеня 2016 г.

г. Мінск,

пляцоўка каля Палаца спорту